შალვა კიკნაველიძე ხობში მაგისტრალური გაზსადენის სარეაბილიტაციო სამუშაოებს გაეცნო

რეაბილიტაცია ქვეყნისთვის უმნიშვნელოვანესი მაგისტრალის 293-298 კილომეტრებს შორის არსებულ სამ დაზიანებულ უბანზე მიმდინარეობს და იგი ძველი, ამორტიზებული მილსადენის პარალელურად ახლის მშენებლობასა და ჩანაცვლებას გულისხმობს.

სამივე მონაკვეთის ჯამური სიგრძე 1,2 კილომეტრია.

პროექტს ნავთობისა და გაზის კორპორაცია სრულად საკუთარი ძალებით - ადამიანური თუ ტექნიკური რესურსით ახორციელებს. პერსონალს სამუშაოების წარმოება საკმაოდ რთულ რელიეფურ პირობებში, ვიწრო სამშენებლო დერეფანში უწევს.

მილსადენი ბუნებრივი აირით ზუგდიდისა და ხობის მუნიციპალიტეტებს ამარაგებს. ამდენად, მისი გამართული ფუნქციონირება სამეგრელოს მოსახლეობისთვის სასიცოცხლოდ აუცილებელია. მიუხედავად მშენებლობის აქტიური ფაზისა, რეგიონებისათვის გაზის მიწოდება არ შეფერხებულა. პრობლემური მონაკვეთების ახლით ჩანაცვლების შემდეგ კი უფრო მაღალი წნევით, უწყვეტი და საიმედო მომარაგება გახდება შესაძლებელი.

სამუშაოები მიმდინარე წლის აგვისტოში დაიწყო და დეკემბერში სრულდება. დარჩენილია ახალი მონაკვეთების ტესტირება, რის შემდეგაც მისი ექსპლუატაციაში მიღება გახდება შესაძლებელი.