საქართველოში პირველი გაზსაცავის მშენებლობის ტექნიკურ-ეკონომიკური დასაბუთების პროექტი დასრულებულია

ვიცე-პრემიერმა/ენერგეტიკის მინისტრმა კახა კალაძემ და საქართველოს ნავთობისა და გაზის კორპორაციის  გენერალურმა დირექტორმა  დავით თვალაბეიშვილმა  პროექტის წარმომადგენლებთან ერთად წარადგინეს სამგორის სამხრეთი თაღის საბადოზე გაზსაცავის მშენებლობის პროექტის ტექნიკურ-ეკონომიკური დასაბუთების  საბოლოო ანგარიშის შედეგები.

ანგარიში საერთაშორისო ტენდერში გამარჯვებულმა ფრანგულმა კომპანია „ჯეოსტოკმა“ მოამზადა, რომელთანაც ხელშეკრულება  საქართველოს ნავთობისა და გაზის კოპორაციამ 2015 წლის ივნისში გააფორმა.

სნგკ-ის გენერალური დირექტორი დავით თვალაბეიშვილი: „ჩვენი ქვეყნისთვის გაზსაცავის მშენებლობა მნიშვნელოვანია, რადგან ის კიდევ უფრო გააძლიერებს ქვეყნის ენერგოუსაფრთხოებას. „თუ მოხერხდება რომელიმე წყაროთი საქართველოში გაზის მიწოდების დროებითი შეფერხება, ქვეყნის მოსახლეობისთვისა და სხვა მომხმარებლისთვის გაზის მიწოდება გაზსაცავიდან იქნება შესაძლებელი“.

ენერგეტიკის მინისტრი კახა კალაძე: „ეს ქვეყნისთვის ერთ-ერთი უმნიშვნელოვანესი სტრატეგიული ობიექტია, რომელიც იქნება გარანტი ქვეყნის გაზმომარაგების უწყვეტი პროცისის უზრუნველსაყოფად“.

საქართველო რეგიონში ერთადერთი ქვეყანაა, რომელსაც გაზსაცავი არ გააჩნია, რაც მნიშვნელოვან პრობლემებს ქმნის გაზის მოწოდების დაუგეგმავი შეწყვეტის, აგრეთვე, მოწოდებასა და მოხმარებას შორის არსებული სეზონური დისბალანსის გამო. 

მოსახლეობისა და ენერგეტიკის უწყვეტი გაზმომარაგების უზრუნველყოფის მიზნით საქართველოს მთავრობამ და „საქართველოს ნავთობისა და გაზის კორპორაციამ“ გადაწყვიტა მიწისქვეშა გაზსაცავის აშენება სამგორის სამხრეთი თაღის საბადოს ბაზაზე. მიწისქვეშა გაზსაცავის მშენებლობით ქვეყანა მიიღებს სტრატეგიული მნიშვნელობის ობიექტს, რომელიც აამაღლებს მის ენერგეტიკულ უსაფრთხოებას, უზრუნველყოფს მომხმარებლებისთვის გაზის მიწოდებას კრიტიკულ სიტუაციებში გაზის მოწოდების შეფერხების შემთხვევაში და შეამცირებს გაზის მოწოდებასა და მოხმარებას შორის არსებული სეზონური დისბალანსით გამოწვეულ პრობლემებს. 

გაზსაცავის მშენებლობის დასრულების შემდეგ მასში 210-280 მილიონი კუბური მეტრი ბუნებრივი გაზის შენახვა იქნება შესაძლებელი, რაც დღევანდელი მთლიანი წლიური მოხმარების დაახლოებით 15%-ს  შეადგენს. 

შესწავლების შედეგების გათვალისწინებით მომზადებული ტექნიკურ-ეკონომიკური დასაბუთების ანგარიშით დადასტურებულია სამგორის სამხრეთი თაღის ნავთობის საბადოს ბაზაზე 210-280 მლნ. კუბური მეტრი სასარგებლო ტევადობის მიწისქვეშა გაზსაცავის მშენებლობის შესაძლებლობა და წარმოდგენილია პროექტის სტრატეგიული დანიშნულებისა და კომერციული მიზანშეწონილობის უზრუნველყოფის პირობები. ანგარიშში აგრეთვე განხილულია პროექტის ტექნიკური და ეკონომიკური პარამეტრების ოპტიმიზაციის შესაძლებლობები და რეკომენდებულია დამატებითი კვლევების ჩატარება უშუალოდ გაზსაცავის მშენებლობის ეტაპის დაწყებამდე.